Dechreuodd yr arweinydd Anthony Hose wersi piano yn dair oed a rhoddodd ei ddatganiad cyntaf yn chwech oed. Astudiodd yn y Coleg Cerdd Brenhinol yn Llundain gan ganolbwyntio ar y Piano, Harpsicord ac Arwain, gan astudio hefyd y Clarinét a’r Bas Dwbl. Parhaodd â’i astudiaethau arwain yn gyntaf yn Salzburg ac yna gyda Rafael Kubelik ym Munich a Genefa.
Mae wedi gweithio gyda cherddorfeydd ledled Ewrop gan gynnwys Cerddorfa Cyngerdd Budapest, Cerddorfa Symffoni Gwlad yr Iâ, Cerddorfa Ffilharmonig y Rhein, Munich Bach Collegium, a’r Orchestre de la Suisse Romande, ac ym Mhrydain gyda’r London Philharmonic Orchestra, Royal Philharmonic Orchestra, Manchester Camerata, English Chamber Orchestra, a’r Gerddorfa Siambr Gymreig y mae’n brif arweinydd arni. Yn y tŷ opera mae wedi arwain nifer o gynyrchiadau i Opera Cenedlaethol Cymru gan gynnwys repertoire o Handel hyd heddiw, sef y rhan fwyaf o operâu Mozart, Verdi, a Puccini. Mae ganddo dros 100 o operâu yn ei repertoire.
Ar gyfer teledu’r BBC mae wedi arwain A Midsummer Night’s Dream gan Britten a pherfformiad cyntaf y byd o The Servants gan William Mathias. Yng Ngŵyl Ryngwladol Buxton, a sefydlodd, mae wedi arwain llawer o operâu gan gynnwys y perfformiad cyflawn cyntaf ym Mhrydain o Háry János gan Kodály a Medée gan Cherubini. Mae wedi darlledu llawer o operâu ar gyfer BBC Radio 3 gan gynnwys Jason gan Cavalli, a gyfarwyddodd o’r harpsicord yn ei wireddiad ei hun, La Colombe gan Gounod, The Queen of Spades gan Tchaikovsky ac opera werin Kodály, The Spinning Room. Mae wedi arwain Opera Gwlad yr Iâ yn rheolaidd, gan recordio fideos o Il Trovatore (Verdi), Les Contes d’Hoffmann (Offenbach), Don Giovanni a Le Nozze di Figaro (Mozart). Ef yw Cyfarwyddwr Artistig Gŵyl Biwmares yng Nghymru.
Mae Maestro Hose wedi bod yn arweinydd gwadd ar gyfer cwmnïau opera gan gynnwys L’Opéra de Lyon, Opera Gothenburg, New Sadler’s Wells Opera, Scottish Opera ac Opera Canolbarth Cymru. Mae hefyd wedi arwain cerddorfeydd gwadd gan gynnwys Cerddorfa Symffoni Ankara, Cerddorfa Symffoni Berlin, Cerddorfa Genedlaethol Gymreig y BBC, English Sinfonia, London Mozart Players, Orlando Philharmonic, Napoli Philharmonic, Royal Liverpool Philharmonic, Sarasota Orchestra a’r Wren Orchestra of London. Yn eiriolwr dros gyfansoddwyr cyfoes mae wedi recordio cryno ddisgiau o gerddoriaeth gan William Mathias, Alun Hoddinott a Syr Michael Tippett.
Bu am nifer o flynyddoedd yn athro yn y Coleg Cerdd Brenhinol a’r Academi Gerdd Frenhinol yn Llundain ac yn athro gwadd i Conservatoire Coleg Cincinnati. Mae wedi rhoi dosbarthiadau meistr cerddorfaol, opera a Lieder ledled Ewrop ac mae’n Gyfarwyddwr Cerddorfeydd ym Mhrifysgol Stetson yn Fflorida.
